Британските трупи патролираат на границата меѓу Косово и Србија како дел од мировното присуство на НАТО, кое е засилено поради загриженоста дека поранешните воени непријатели би можеле да се вратат во отворен конфликт по серијата насилни инциденти во последните месеци, пишува Ројтерс.
Според Ројтерс, Организацијата на Северноатлантскиот договор испрати стотици дополнителни војници на Косово од ОК и Романија по инцидентот меѓу косовските власти и вооружените Срби, кој на 24 септември го претвори „мирното село во северно Косово во воена зона“. Се објаснува дека во Бањска биле убиени тројца вооружени напаѓачи и еден полицаец и дека ова се смета за најголемото насилство откако Косово прогласи независност во 2008 година.
Косово ја обвини Србија дека обезбедува финансиска и практична поддршка на вооружените напаѓачи, што Белград го негира.
НАТО испрати 1.000 дополнителни војници во регионот, со што своето присуство таму достигна 4.500 војници од 27 земји.
Според Ројтерс, британските војници сега се распоредени во 18-часовни смени за да се осигураат дека нема оружје или вооружени групи да влезат во Косово.
Потполковник Џос Гади од британската армија изјави за Ројтерс дека војниците исто така собираат „разузнавачки информации за која било незаконска или сомнителна активност која потоа се испраќа до КФОР и пошироко“.
За време на посетата на Западен Балкан во понеделникот, генералниот секретар на НАТО Јенс Столтенберг рече дека организацијата размислува дали е потребно потрајно зголемување на силите „за да се осигура дека тоа нема да излезе од контрола и да не создаде нов насилен конфликт на Косово или во поширокиот регион“.
