Над 100 делфини се најдени мртви во областа на Амазон во Бразил, а можна причина за тоа е историската суша што ја погоди земјата и рекордно високите температури на водата, кои надминаа 38 степени.
Мртвите делфини биле пронајдени во езерото Тефе во последните седум дена, соопшти Институтот Мамирауа, истражувачки објект под покровителство на Министерството за наука.
Од Институтот наведоа дека толку голем број на загинати единки е невообичаен и дека причина може да бидат рекордните температури на водата, но и сушата.
– Сè уште е рано да се утврди причината за ваквата екстремна појава, но според нашите експерти, тоа секако е поврзано со сушниот период и високите температури во езерото Тефе, кои на некои места надминаа и 39 степени Целзиусовин- соопштија од Институтот.
Активистите и истражувачите се обидуваат да ги спасат преживеаните делфини, преместувајќи ги од лагуните и езерата до главниот поток каде водата е поладна, објави Си-Ен-Ен Бразил.
– Префрлањето на речните делфини во други реки не е безбедно, бидејќи е неопходно да се проверат токсините и вирусите кои се присутни пред да се ослободат животните – изјави Андре Коелјо, истражувач од Институтот Мамирауa.
Сушата во Амазон влијае и на економијата. Под просечни нивоа на вода се пријавени во 59 општини во државата Амазонас, што ги попречува транспортните и риболовните активности на реката.
Властите очекуваат уште поакутни суши во следните неколку недели, што може да резултира со понатамошни смртни случаи на делфини, објави Си-Ен-Ен Бразил.
