Рускиот претседател Владимир Путин пристигна во виетнамскиот главен град Ханој. Ова е втора станица од неговата турнеја во Источна Азија.
Патувањето, кое доаѓа по неговата раскошна посета на Северна Кореја, се толкува како демонстрација на дипломатската поддршка што Русија сè уште ја ужива во овој регион, пишува Би-Би-Си во сопствена анализа.
Во неа се вели дека Соединетите Американски Држави ја критикуваа посетата поради тоа што му дала платформа на претседателот Путин да ја промовира својата војна за агресија во Украина.
„Виетнам сè уште ги цени историските врски што ги има со Русија, иако работи на подобрување на односите со Европа и САД“, пишува Би-Би-Си.
„Во Ханој, надвор од малиот парк во Ба Дин, инаку политичкиот кварт во градот, статуа на Ленин висока пет метри го прикажува рускиот револуционер во херојска поза. На неговиот роденден секоја година делегација од високи виетнамски функционери свечено положуваат цвеќе и ги наведнуваат главите пред статуата, подарок од Русија кога земјата сè уште се викаше Советски Сојуз“, се додава во анализата.
Каква е историјата на односите меѓу Виетнам и Русија? Би-Би-Си анализира:
„Врските на Виетнам со Русија се блиски и датираат многу децении наназад, до виталната воена, економска и дипломатска поддршка која Советскиот Сојуз му ја даде на Северен Виетнам во 1950-тите. Северен Виетнам тогаш беше новоформирана комунистичка држава.
Откако Виетнам ја нападна Камбоџа во 1978 година за да го исфрли режимот на Црвените Кмери, тој беше изолиран и санкциониран од Кина и Западот и во голема мера зависеше од советската помош. Многу постари Виетнамци, вклучително и моќниот генерален секретар на комунистичката партија Нгуен Фу Тронг, студирале во Русија и го научиле рускиот јазик“, продолжува статијата.
Денес економијата на Виетнам е трансформирана со нејзината интеграција на глобалните пазари. Русија е далеку зад Кина, Азија, САД и Европа како трговски партнер. Но, Виетнам сè уште користи главно воена опрема од руско производство и се потпира на партнерства со руски нафтени компании за истражување на нафта во Јужното Кинеско Море.
Дали нешто се смени сега во екот на војната во Украина?
„Окупацијата на Украина го стави Виетнам пред дипломатски предизвик, но тој досега успеа да го исполни предизвикот. Виетнам избра да се воздржи од различните резолуции во Обединетите нации со кои се осудуваат постапките на Русија, но сепак одржува добри односи со Украина, па дури и испрати одредена помош за Киев. И таму луѓето споделуваат наследство од советската ера – илјадници Виетнамци работеле и студирале во Украина“, се забележува во текстот.
„Сето ова е во склад со долгогодишните принципи на Виетнам за надворешна политика да се биде пријател со сите, но избегнување на сите формални сојузи – она што раководството на комунистичката партија сега го нарекува „бамбусова дипломатија“. Тоа значи да не се заземаат страни кога станува збор за ривалството меѓу големите сили“.
Анализата вели и дека Виетнам поради ова лесно ги унапредил односите со САД, а одржува и блиски врски со Кина, поради извозот.
САД се спротивставија на официјалната посета на претседателот Путин на Виетнам со образложение дека таа ги поткопува меѓународните напори за негово изолирање. Од друга страна, останува нејасно колку долго Виетнам го одржува пријателството со Владимир Путин.
Во анализата се заклучува дека земјата бара алтернативни извори на воена опрема, но за да се смени нејзината сегашна зависност од Русија ќе требаат години.
