Легендарната музичка дива Тереза Кесовија пред еден месец наполни 86 години и роденденот го прославила во болница. Пејачката во октомври беше хоспитализирана поради долготрајна температура и мачнина, а по излегувањето од болница откри дека со години го губи видот и слухот, пренесува „Мондо.рс“.
„Првпат отидов на операција во 2008 година. Во Загреб, па во Париз. Оттогаш користам слушни помагала, без нив сум изгубена“, изјавила пејачката за хрватскиот магазин „Глорија“ и додала:
„По концертот гледам како публиката воодушевено аплаудира, но јас не слушам ништо. Би се концентрирала, со години читам од усни кога некој зборува, но поинаку е кога слушаш глас“.
Тереза Кесовија додала дека не се обидела да го сокрие фактот дека денес користи слушно помагало, а истакнала дека видот и е слаб што и го отежнува читањето.
„Можам да пишувам и читам пораки со помош на најсовремен уред кој ги максимизира буквите. Но, кога земам книга, морам да ја оставам настрана, бидејќи екранот на овој уред не е многу голем и навистина е непријатно за читање, но тоа е моја страст, исто како и пеењето, уживам во книгите од мали нозе“.
