Премиерот Христијан Мицкоски се надева дека уште денеска ќе се стабилизира состојбата во РЕК Битола, односно дека уште денеска ќе се санира дефектот во трите блокови кои од утрово се исклучени од мрежа и не произведуваат струја.
– РЕК Битола е во алармантна и катастрофална состојба поради сето она што се случувало во изминатите години. Но, се бориме. Денеска очекувам да се стабилизира состојбата и да продолжиме со редовно производство. Гледате, сѐ функционира нормално – истакна премиерот Христијан Мицкоски, одговарајќи на новинарско прашање.
Инаку, ноќеска трите блока во РЕК Битола се надвор од мрежата.
„Термоелектраната ‘Битола 2’ утрово во 8.22 часот поради активирана заштита е исклучена од функција. Шест минути подоцна, од електроенергетската мрежа е исклучен и термоблокот ‘Битола 1’ поради активирање на заштитата на трансформаторот за сопствени потреби. Благодарение на навременото активирање на заштитата, не е предизвикана штета врз ТЕ Битола 1. Согласно досега направените анализи, од стручните екипи на ТЕ Битола, станува збор за надворешни причини кои дополнително ќе се утврдуваат. Во моментов течат операции за повторно вклучување на ТЕ Битола 1 во електроенергетската мрежа. Веднаш по синхронизацијата на ТЕ Битола 1 во електронергетскиот систем, во текот на денот ќе почнат операции за вклучување на ТЕ Битола 3, кој согласно планот за производство изминатите денови не беше во функција“, соопштија од ЕСМ.
