Принцезата Ана претрпе губење на меморијата откако се здобила со повреди на главата, објави британски Телеграф.
Бакингемската палата вчера соопшти дека 73-годишната принцеза се здобила со полесни повреди и потрес на мозокот по инцидент на својот имот во Глочестершир. Се шпекулира дека до несреќата дошло кога таа паднала од коњот.
Таа била задржана во болницата Саутмед во Бристол како мерка на претпазливост за набљудување.
Поради губење на сеќавањето, точните околности на несреќата остануваат непознати. Сепак, нејзиниот медицински тим рече дека нејзините повреди се во согласност со ударот од коњот.
Нејзиното губење на сеќавањето, кое се однесува само на инцидентот, се смета дека веројатно е привремено.
Се очекува таа да биде пуштена од болница кон крајот на оваа недела.
На принцезата не ѝ е првпат да го изгуби помнењето по несреќа предизвикана од коњи. На Олимпијадата во 1976 година, таа претрпела лош пад при скок бидејќи нејзиниот коњ Гудвил се заглавил во мочуришна кал. Таа подоцна го опиша нејзиното сеќавање како „речиси непостоечко за тој ден“, објави британски Телеграф.
