Претседателот на САД Џозеф Бајден се сопнал неколку пати додека се шетал со првата дама Џил Бајден на песочната плажа во американската држава Делавер, објавија американските медиуми.
Бајден (81) се сопнал неколку пати, па дури му била потребна помош од првата дама додека се шетал на песочна плажа во близина на неговиот дом во Делавер во неделата, според видео снимките на американската телевизиска мрежа „CSPAN“, објави Њујорк Тајмс.
Американскиот претседател во заминување изгубил рамнотежа неколку пати додека се движел по нестабилниот песок на плажата Рехобот во неделата попладне. Бајден потоа го засили темпото додека новинарите го прашаа што ќе разговара со новоизбраниот претседател Доналд Трамп на состанокот во Белата куќа во средата, а тој не одговори на ниту едно од прашањата на медиумите.
„Бајден моментално се бори со песокот во неговата куќа на плажа во Делавер. Песокот победува“, се вели во објавата на сметката на Платформа Х на Републиканскиот национален комитет.
Двојката се врати во Белата куќа неколку часа подоцна.
Бајден се откажа од својата кандидатура за реизбор во јули, по серија критики за неговите ментални и физички способности и ја поддржа американската потпретседател Камала Харис да биде демократски претседателски кандидат.
