Повеќе од 65 години откако дете на околу петгодишна возраст било пронајдено мртво во Филаделфија, истражните власти на САД објавија дека со помош на ДНК-анализа успеале да го откријат неговиот идентитет, објавија американски медиуми.
Случајот познат како „Дете во кутија“ е најстарото нерасчистено убиство во Филаделфија. Детето било пронајдено завиткано во ќебе во картонска кутија во шумска област во североисточна Филаделфија на 25 февруари 1957 година.
Националниот центар за исчезнати и експлоатирани деца тогаш објави дека дека момчето имало неколку лузни на телото и дека косата му била насилно исечена. Се проценува дека момчето било на возраст меѓу четири и шест години. Детето тежело околу 13 килограми и било неухрането, потсетува Си-ен-ен.
– И покрај бројните обиди да се идентификува детето низ годините, идентитетот на момчето остана мистерија. Преку детективска работа и ДНК анализа, полицијата конечно успеа да го идентификува детето – соопшти полицискиот оддел во Филаделфија.
Полицијата не го објави името на момчето и соопшти даека продолжува истрагата по убиецот на детето. Распишана е награда од 20.000 долари за информација која ќе доведе до решевање на случајот.
