НАТО објави дека во 2023 година ја ангажирал својата авијација повеќе од 300 пати за пресретнување на руски воени авиони, а повеќето од инцидентите наводно биле регистрирани над Балтичкото Море.
„Во текот на 2023 година, воздушните сили на НАТО низ Европа беа ангажирани повеќе од 300 пати за пресретнување на руски воени авиони кои се приближуваа до воздушниот простор на Алијансата, при што најголемиот дел од пресретнувањата се случија над Балтичкото Море“, се вели во соопштението.
НАТО ги креваше своите борбени авиони иако не ја знаеше целта на руските авиони кои се приближуваа до членките на Алијансата.
„Поголемиот дел од воздушните средби меѓу руските авиони и авионите на Алијансата беа безбедни и професионални. Руските воени авиони ретко го нарушуваа воздушниот простор на НАТО, а тоа беше главно краткотрајно“, се додава во соопштението.
Министерството за одбрана на Русија во повеќе наврати објави дека руските авиони летаат строго во согласност со меѓународните правила за користење на воздушниот простор над неутрални води, без да ги преминуваат воздушните линии и опасно да се приближуваат до авионите на странски земји.
