Полската влада подели таблети со јод до противпожарните заедници ширум земјата за да можат веднаш да бидат дистрибуирани во случај на потреба. Одлуката е донесена поради стравувањата за безбедноста на нуклеарните централи во Украина.
„Ова е стандардна процедура пропишана со закон и се применува во случај на можна опасност од радијација. Воедно, ве известуваме дека во моментов нема таква опасност и Националната агенција за нуклеарна енергија постојано ја следи состојбата“, соопшти МВР.
Тие нагласија дека сите служби се во состојба на готовност и дека се обезбедени доволни дози на јод за сите полски граѓани.
Во случај на потврдена контаминација, планот е да се дистрибуираат таблети со јод кои помагаат во апсорпција на радиоактивни материи. По катастрофата во Чернобил во Украина во 1986 година, полските власти исто така дистрибуираа јод на милиони граѓани, особено на децата.
Во март оваа година, руските сили ја зазедоа украинската нуклеарна централа Запорожје, најголемата во Европа. Оттогаш има безбедносни грижи. Енергоатом, кој управува со нуклеарните централи во Украина, соопшти дека Русија во неделата истрелала проектили на втората по големина нуклеарна централа во Украина, пишува Notes од Полска.
Во понеделникот полската национална агенција објави дека оштетените системи не се важни за безбедноста на нуклеарната централа.
Да потсетиме, уште во март, многу брзо по руската инвазија на Украина, повеќе од двојно се зголеми бројот на аптеки кои продаваат јод во Полска, а интересот за јод се зголеми за околу 50 пати во една недела.
