Полицискиот службеник Елвис Ќустендил е осомничен за убиство на 53-годишната Амра Кахримановиќ на 7 февруари годинава во Тузла, Босна и Херцеговина, а Кантоналното обвинителство му одредило притвор, пренесува Аваз.
Ќустендил е осомничен дека откако Амра Кахримановиќ, косопственик на ресторан во Трговскиот центар Сјењак во Тузла, дошла околу 21:00 часот да го затвори ресторанот и да ја напушти просторијата, тој одеднаш станал, ја следел жртвата во ходникот на трговскиот центар и од непосредна близина на подмолен начин испукал еден истрел во грбот на повредената.
Пукал со службен пиштол, а откако ја застрелал во грб, додека жртвата лежела на подот, испукал уште петнаесет истрели во различни делови од телото.
Набргу по настанот, осомничениот бил приведен од припадници на Единицата за поддршка на МВР ТК пред зградата во која живее во Тузла.
Но, како што му рекол во текот на разговорот, тој воопшто немал мотив да ја убие Амра, која ја познавал, како и целото нејзино семејство и дека воопшто не знае што направил.
– Tој ми тврди дека бил во растројство, дека не се чувствувал добро во последните неколку дена. Кога зборуваме за мотивот, тој не наведува никаков мотив. Човекот вели дека не се сеќава на првиот истрел воопшто. Тој вели дека бил во кафеана, но дека не се сеќава што навистина се случило. Што направил сфатил дури во полициската управа, кога ги поминал сите процедури и му кажале дека тој е уапсен – рече Хеќимовиќ.
Трагично убиената Амра, која денеска ќе биде погребана на гробиштата Буковчиќи во Тузла, во недела на 11 февруари требаше да наполни 53 години. Градската управа на Тузла прогласи Ден на жалост.
