Човек од Хјустон, кој исчезна како тинејџер пред повеќе од осум години, е пронајден од полицијата како спие пред локална црква. Рудолф Руди Фариас бил пријавен за исчезнат на 6 март 2015 година, а на 29 јуни годинава полицијата добила итен повик и по пристигнувањето потврдила дека се работи за исчезнат маж, пишува CNN.
Не е познато каде бил Фариас низ годините или како дошол до повикот што го споил со неговото семејство бидејќи тој е невербален. Неговата мајка, Џени Сантана, рече дека ја добива потребната нега за да ја надмине траумата. Руди го пронашол добар Самарјанин кој се јавил на 911, се вели во соопштението на семејството, додавајќи дека немаат други информации за неговиот случај.
Откако полицајците го прегледале, мажот одбил да оди во болница, а мајка му потпишала формулар со кој му дозволува да остане со семејството. Тексасскиот центар за исчезнати лица не сакаше да ги коментира околностите во кои е пронајден Руди, туку само накратко соопштија дека фокусот е на исчезнатото лице и неговото семејство.
„Нашата мисија е да го поддржиме семејството чии најблиски исчезнаа, Руди Фариас исчезна пред осум години и сега е безбеден. Во Тексас Центарот за исчезнати, продолжуваме да го поддржуваме семејството нудејќи им надеж и исцелување“, изјави Мелиса Ранџел за Си-Ен-Ен во понеделникот.
Како што пренесува Јутарњи, Фариас, кој тогаш имал 17 години, ги шетал своите две кучиња во северозападниот дел на Хјустон кога исчезнал. Во септември 2018 година полицијата добила информација дека тој спиел зад куќа на член на семејството, но не бил пронајден. Според Националниот центар за исчезнати и експлоатирани деца, речиси 360.000 пријави за исчезнати деца биле поднесени до ФБИ во 2022 година.
Инспекторите закажаа разговор со Фариас за среда, а целиот случај останува под истрага.
