„Саем на книга“ во Скопје започнува на 18 април, а во него ќе учествуваат над 60 издавачки куќи и ќе има повеќе од 30 промоции на книги на домашни и на странски автори.
Ова издание на „Саем на книга“, кое годинава се одбележува под мотото „Приказна се чита”, повторно ќе се одржи во арената „Борис Трајковски“ во периодот од 18 до 24 април.
Во текот на седумте саемски денови, посетителите ќе можат да си одберат книги од богатата понуда на домашни и на странски автори од преку 60 издавачки куќи од Македонија и од регионот, а ќе можат и да присуствуваат на преку 30-те промоции на нови книги и автори, во рамките на Саемот.
„Саем на книга 2024“ ќе биде отворен за посетители на 18 април од 10.00 часот, додека, пак, официјалното отворање на кое ќе се обрати и министерката за култура, г-ѓа Бисера Костадиновска Стојчева, ќе се одржи истиот ден во 12.00 часот.
Слоганот на Саемот оваа година е „Приказна се чита”, инспириран од растечкото присуство на социјалните мрежи и од начинот на брзо информирање преку опцијата наречена „story” (мак. „приказна”). Оваа реченица ги поврзува опцијата за објавување „стори” на социјалните мрежи со приказните кои ги бараме во литературата и кои се раскажани во нашите омилени книги. Саемот така се обидува да испише една нова страница во постоењето, приближувајќи се до новата генерација и до новиот стил на живот преку јазик и жаргон препознатлив за модерното време.
Покрај широкиот избор на книги, Саемот оваа година организира и едукативни работилници, промоции и средби со автори кои ќе се реализираат на штандовите на издавачите, како и забавна детска програма која со сигурност ќе ги заинтеиресира најмладите посетители.
Во рамки на програмата се предвидени организирана прошетка низ „Саем на книгата“, „брзи состаноци” со македонски издавачи, презентација на Конкурсот за странски преводи на македонски автори на Министерството за култура на Република Северна Македонија, панел-дискусија за време на саемот во којашто ќе учествуваат учесниците на Фелоушип-програмата, како и неформални дружења со македонски писатели, издавачи, преведувачи, како и туристичка тура низ Старата чаршија и центарот на Скопје, која ќе ја води македонскиот писател Васко Марковски.
По отворениот повик, комисијата на МАИ формирана за оваа намена, избра 5 учесници на Фелоушип-програмата: Флоранс Жири („Агенција „Флоранс Жири”, Франција), Петра Кавчич (издавачка куќа „Белетрина”, Словенија), Јанис Краниас (издавачка куќа „Ентипоис публикејшенс”, Грција), Ена Хасечиќ (издавачка куќа „Бајбук”, БИХ), Мирослава Уљаревиќ (издавачка куќа „Ободско слово”, Црна Гора).
Фелоушип-програмата е поддржана од Министерството за култура на Република Северна Македонија, а нејзината цел е да ги запознае издавачите и книжевните агенти со домашното издаваштво, со трендовите во современата македонска книжевност, со нашите најистакнати писатели и да им „открие” дела што можат да ги внесат во својата издавачка програма.
„Саем на книг“а ќе биде отворен за посетители од 18 до 24 април, секој ден помеѓу 10.00 и 20.00 часот, освен на денот на затворањето кога ќе работи до 18.00 часот. Покровител на „Саем на книга“ традиционално е Министерството за култура на Македонија.
За сите дополнителни информации во текот на претстојниот саем, следете го Скопски Саем на www.skopskisaem.mk и на @skopski.saem на Instagram и Скопски саем – Skopski saem на Facebook.
