Американскиот новинар Еван Гершкович накратко се појави во рускиот суд, со свежо избричена глава, на почетокот на неговото судење во Русија поради шпионажа, обвинение што американскиот новинар го негира, објави британски Телеграф.
Во придружба на руски офицер, Гершкович изгледаше како да е расположен додека стоеше во стаклена кутија, облечен во карирана кошула со рацете лежерно бутнати в џеб.
Новинарот на „Волстрит журнал“ првпат беше уапсен и приведен во март 2023 година откако Русија тврдеше дека „собирал тајни информации“ по наредба на американската Централна разузнавачка агенција (ЦИА).
32-годишниот новинар се соочува со казна затвор до 20 години доколку биде прогласен за виновен, а поминал повеќе од една година во московскиот затвор „Лефортово“.
Рускиот претседател, Владимир Путин, изјави дека е отворен за идејата за размена на затвореници во која ќе биде вклучен Гершкович и дека се воспоставени контакти со САД, но тие мора да останат тајни.
САД ја обвинија Русија дека води „заложничка дипломатија“. Според Вашингтон, Гершкович и уште еден притворен Американец, поранешен американски маринец Пол Вилан, се „погрешно приведени“.
Судењето треба да се одржи зад затворени врати – нешто што Русија вели дека е нормално во случаите на шпионажа.
