Актерката Лиза Лоринг, која се прослави со улогата на Среда во култната серија „Семејството Адамс“, почина во саботата на 28 јануари како последица од мозочен удар, на 64-годишна возраст.
Нејзината блиска пријателка Лор Џејкобсон ја сподели трагичната вест на Фејсбук:
„Со голема тага ве информирам дека нашата пријателка Лиза Лоринг почина. Пред четири дена доживеа масивен мозочен удар предизвикан од пушење и висок крвен притисок. Таа беше на апарати за одржување во живот три дена. Вчера нејзиното семејство ја донесе тешката одлука да ја исклучат од апарати и таа почина синоќа“.
Лиза беше оригиналната Среда Адамс (Wednesday Addams), а деновиве овој познат лик во кино е повторно во центарот на вниманието благодарение на хит серијата на продуцентската куќа Нетфликс „Wednesday“ (Среда).
Актерката го „оживеа“ ликот на Среда кога имаше само шест години, а серијата се прикажуваше од 1964 до 1966 година и имаше 64 епизоди.
„Таа е неизоставен дел од поп културата и во нашите срца секогаш ќе биде Среда Адамс. Убава, љубезна, сакана мајка… Наследството на Лиза во светот на забавата е огромно! А наследството што го остави на семејството и пријателите, хуморот, наклонетоста и љубовта, таа уште долго ќе живее во нашите срца. Почивај во мир Лиза. Проклетство, девојко… беше многу забавна“, напиша пријателката Лор на социјалните мрежи.
Лоринг се мажела четири пати, а зад неа останаа две ќерки – Маријана и Ванеса, како и внуците Емилијана и Чарлс.
ФОТО: Јутјуб/Инстаграм
