Пситакозата, бактериска инфекција позната и како папагалска треска, се проширила во неколку европски земји, објави во вторникот Светската здравствена организација. Болеста однесе пет животи во овој бран.
Избувнување беше забележано во 2023 година, а ширењето на болеста продолжи и оваа година. Досега се пријавени пет лица кои починале од папагалска треска.
Пситакозата е предизвикана од бактерија од семејството на кламидија, која е домаќин на различни видови домашни и диви птици. Заразените птици можеби не изгледаат болни, но ги пренесуваат бактериите преку измет или дишење.
Најчестиот начин на кој луѓето се инфицираат е со вдишување прашина што содржи инфицирани птичји секрети, според американскиот Центар за контрола и превенција на болести. Луѓето можат да се разболат и ако ги касне птица или преку контакт со клун-уста. Бактериите не можат да се пренесат со јадење заразено месо.
Преносот од човек на човек е можен, но исклучително редок, покажа студијата. Во најновите случаи, луѓето биле изложени на домашни или диви птици, кои биле заразени, соопшти СЗО.
Повеќето луѓе кои се заразуваат со папагалска треска имаат благи симптоми на болеста, кои започнуваат пет до 14 дена по изложувањето на изворот на инфекцијата. Симптомите вклучуваат главоболка, болки во мускулите, сува кашлица, висока температура и треска. Болеста се лекува со антибиотици и многу ретко е фатална кај луѓето.
Австрија пријавила 14 случаи во 2023 година, а уште четири оваа година. Случаите не се поврзани, а ниту еден од заразените не патувал во странство, ниту бил во контакт со диви птици.
Во Данска, обично има меѓу 15 и 30 случаи годишно, а повеќето од заразените се хобисти кои одгледуваат гулаби и ги тренираат за трки. Земјата има пријавено 23 случаи заклучно со 27 февруари, но здравствените власти веруваат дека има многу повеќе.
Од сите случаи во Данска, 17 лица се хоспитализирани, 15 имале пневмонија, а четворица починале.
Најмалку едно лице во Данска се заразило преку домашно милениче. Од 15 преостанати случаи, 12 рекле дека имале контакт со птици во природата што ги хранеле. Во три случаи, пациентите не можеле да се сетат на никаков контакт со птици.
Германија пријавила 14 случаи на папагалска треска во 2023 година, а уште пет оваа година. Речиси сите имале пневмонија, а 16 од нив се хоспитализирани.
Од 19 случаи во Германија, пет биле во контакт со болни миленичиња или живина во домаќинствата.
Шведска бележи зголемен број случаи на папагалска треска од 2017 година. Иста е ситуацијата и во Холандија, каде сите заразени се хоспитализирани, а едно лице почина.
СЗО соопшти дека продолжува да го следи избувнувањето, а на луѓето во погодените земји кои доаѓаат во контакт со птици и живина им се препорачува да се грижат за хигиената на рацете. СЗО посочува дека оние кои чуваат птици како домашни миленици треба да се погрижат кафезите да бидат чисти и да не се пренатрупани.
