Од ВМРО-ДПМНЕ ги обвинија владејачките партии СДСМ и ДУИ дека тие во континуитет го блокираат Собранието и го девалвираат.
„Го претворија законодавниот дом во партиска алатка за нивните интереси. СДСМ и ДУИ кршат деловнички и уставни норми кога ќе им текне и после со манипулативни соопштенија обвинуваат други“, велат од опозициската партија.
Во партиското соопштение се наведува дека во изминатиот период, Собранието е под контрола на Владата.
„Седум месеци нема пратенички прашања, што значи дека СДСМ и ДУИ ја суспендираа клучната собраниска алатка за контрола на Владата. Дополнително СДСМ и ДУИ блокираат донесување на Декларација за Гоце Делчев во годината кога се одбележува јубилејот 150 години од неговото раѓање. СДСМ и ДУИ исто така се обидуваат шверцерски да протуркаат измена на закон за наставници со кој се овозможува партизација на образованието преку вработување на наставници на неопределено време, без приправнички стаж. Да не зборуваме за огромниот број злоупотреби на европското знаменце за закони кои немаат никаква врска со европската регулатива – додаваат од партијата.
