Во тешката сообраќајна несреќа што се случи утрово во близина на Битола, кај местото познато како Кукречанска раскрсница, животот го загуби 24-годишно момче, соопштија од Битолското обвинителство по извршениот увид на местото на несреќата.
Според првичните сознанија, до несреќата дошло при директен судир на автомобилот „опел корса“ со битолски ознаки, со кој управувал 24-годишникот, и товарно возило со штипска регистрација.
Во несреќата, патничкото возило се запалило, а телото на возачот било опожарено, соопштија од МВР.
„Денеска (24.07.2023) во 05.08 часот во СВР Битола било пријавено дека се случила сообраќајна несреќа помеѓу товарно моторно возило ‘сканиа’ со прилколка со штипски регистарски ознаки, управувано од Б.М. (44) и патничко моторно возило ‘опел корса’ со битолски регистарски ознаки. Во несреќата, патничкото возило се запалило, а телото на возачот било опожарено“, стои во известувањето од МВР.
Телото на починатото момче е предадено на обдукција. Битолското обвинителство постапува за откривање на причините за несреќата.
