Кимчи, како и другите ферментирани намирници, беше рангирана на првото место на годишната листа на топ 10 суперхрани на списанието „Полок комуникации“ и „Тудејс диетитијан“.
Кимчи, традиционално корејско јадење направено од ферментирана зелка и паста гочугару, нутриционистите го прогласија за една од 10-те најдобри суперхрани за 2023 година во новото истражување.
Годишното истражување „Што е тренд во исхраната“ анкетираше 757 регистрирани диететичари и нутриционисти за да одреди која храна богата со хранливи материи ќе ја ценат потрошувачите во 2023 година.
Кимчи, јогуртот, чајот од комбуха и киселиот зеленчук се на прво место, а потоа следат семките, боровинките, авокадото, јаткастите плодови, лиснатиот зеленчук, хлорелата и спирулината, зелениот чај, житариците и растителните млека. За прв пат по 11 години, откако е спроведено истражувањето, сите 10 намирници се вклопуваат во растителна исхрана.
Диететичарите веруваат дека поради зголемените трошоци за живот, потрошувачите во 2023 година ќе му дадат приоритет на здравјето и ќе бараат функционална храна која го зајакнува имунитетот и здравјето на дигестивниот систем, поради што ферментираната храна го зазема првото место.
Кимчи стана популарен меѓу потрошувачите кои се свесни за здравјето во последниве години поради неговите пробиотски, антиоксидантни, антимутагени и антиканцерогени својства, како и други здравствени придобивки. Претходните истражувања покажаа дека кимчи, заедно со друга ферментирана храна, може да помогне во намалувањето на опаѓањето на косата и спречување на анксиозност кај младите луѓе, пишува Индекс.
