Централното претседателство на Демократската унија за интеграција денеска информира за вчерашната седница одржана во седиштето во Мала Речица и изразува жалење што од раководството „сами се отстраниле пет члена“, при што се мисли на припадници на „огнената фракција“. ДУИ најави избор на нови раководства во партиските ограноци.
Централното претседателство на ДУИ изразува длабоко жалење за одлуката на петтемина членови на претседателството на партијата за самоотстранување од Централното претседателство на ДУИ, одлука што ја донеле на состанокот на Централниот комитет на 1 април годинава, се вели во соопштението од Мала Речица.
Во соопштението се наведува дека Централното претседателство ја официјализира одлуката за претстоен изборен процес во ограноците на ДУИ што ќе се одржи на 2 јули.
„Овие избори во ограноците на ДУИ кои ќе се одржат по принципот ‘еден член’ гласање, ќе служи како платформа за колективно одлучување и ќе ги зајакне демократските вредности што ја карактеризираат нашата партија. Демократската унија за интеграција продолжува да работи за напредок, единство и непоколеблива посветеност на принципите кои не водеа во текот на патувањето до сега“, се вели во соопштението.
Неформалниот лидер на „огнените“ Изет Меџити завчера во интервју за Коха изјави дека во ДУИ на таен состанок била донесена одлука за нивно отстранување од партијата, а дека најавените избори се всушност распипшани за „огнените“ и дефинитивно да бидат отстранети подалеку од структурите на партијата.
– Сите кадри кои поддржуваа различно мислење и се дел од фракцијата беа разрешени и политички диференцирани како во 80-те во комунистички стил, додека во јавноста се обидуваат да го релативизираат тоа, бидејќи овие позиции припаднаа на Алијансата за Албанците, но граѓаните ги читаат овие ситуации – рече Меџити.
