Синоќа околу 20 часот во Истанбул, Туркије, убиен е водачот на кланот Шкаљар, Јован Вукотиќ, дознава црногорскиот портал Вијести повикувајќи се на повеќе извори.
Вукотиќ во досиејата на тајната полиција бил означен како апсолутен водач на криминалниот клан Шкаљар, а тој беше во бегство и црногорските правосудни органи по него распишаа потерница пред една година.
Вукотиќ беше уапсен и во Туркије во септември 2018 година, кога беше екстрадиран во Србија. Тој беше осуден од Вишиот суд во Белград на 15 месеци затвор за користење фалсификуван македонски пасош со негова фотографија.
Опозициската ВМРО-ДПМНЕ во април минатата година брифираше дека „за нарко-босот Вукотиќ, полицијата во Драчево изработила пасош со лажен идентитет, на име Георги Андонов“.
ВМРО-ДПМНЕ тогаш откри дека полициската апаратура издала патни исправи со лажен идентитет за водачот на озлогласениот Шкаљарски клан за трговија со дрога, Јован Вукотиќ, како и за водачот на турската мафија Седат Пекер, кој до неодамна бил во државата, но повторно влегол и добил лична карта.
Информацијата за убиството на Вукотиќ на својот Фејсбук профил денеска ја сподели и пратеникот од редовите на ВМРО-ДПМНЕ, Антонио Милошоски, потсетувајќи ја јавноста дека нарко-босот добил македонски пасош во Драчево.
„Нарко-босот Вукотиќ, кој од МВР на Спасовски доби македонски пасош во Драчево (на име Георги Андонов), денес е убиен во Истанбул“, напиша Милошоски.
Кој е Јован Вукотиќ?
Тој е шеф на најмоќниот балкански клан кој работи со трговија на кокаин и наркотици на Балканот и во Источна Европа. Кланот ја обезбедува српската и црногорската мафија и е во отворен конфликт со Кавачкиот клан против чиј огранок во моментот има полициска акција во Србија.
Шкаљарскиот клан има повеќе свои операциони единици во чиј состав влегуваат и криминалците како Лука Бојовиќ, шеф на Земунскиот клан, моментално во затвор во Шпанија.
Некои од најблиските соработници на Вукотиќ, Игор Дедовиќ и Стеван Стаматовиќ, беа убиени во Атина. Таму се криеја откако претходно беа барани за убиство на двајца членови на Кавачкиот клан.
Освен Јован Вукотиќ, еден од лидерите на клан е и неговиот роден брат Игор Вукотиќ. Тука е и Владан Радоман, брат на Горан Радоман, по чие убиство започнува борбата со соперничкиот Кавачки клан и исчезнувањето на 300 килограми кокаин во Валенсија, Шпанија.
Јован Вукотиќ беше осомничен за обид за убиство на Милош Радоњик и Војнина Ступара, а се тврдеше и дека пукал на Звицер.
Досега Вукотиќ е осуден за помагање при убиство и недозволено поседување на оружје.
