Од тоа што можам да следам во кампањата, тоа се пораки кои се вообичаени и во делот на преткампањата, гледам дека во албанскиот условно кажано блок кампањата се води со испраќање на пораки со прес-конференции, многу малку теренска кампања, можеби тоа беше поради празникот Рамазан Бајрам. Очекувам сега поголема динамика. Во останатите кандидати гледаме вообичаени пораки, нема нешто ново, изјави претседателот на ВМРО-ДПМНЕ, Христијан Мицкоски по средбата со МАСИТ одговарајќи на новинарски прашања.
Мицкоски истакна дека клучни се пораките кои се презентираат на настаните за време на кампањата за Гордана Силјановска Давкова која ќе биде идниот претседатеел на Македонија.
– И очекувам дека довербата која ќе ја добијат Силјановска Давкова и коалицијата ВМРО-ДПМНЕ со коалицијата твоја Македонија да направат нешто ново за Македонија и поразлично од тоа што се гледаше сега – рече Мицкоски.
Мицкоски додаде дека во кампањата не го коментира Ковачевски бидејќи човекот исчезна, го нема.
– Пендаровски се срами од Ковачевски како претседател на партијата која го поддржа или е нешто друго како причина, но човекот исчезна. Што се однесува до Пендаровски и начинот на кој води кампања веќе кажав дека човекот најмалку што треба да направи е да ѝ се извини на професорката Гордана Силјановска Давкова, но тој тоа не го прави, продолжува со навреди. Ако оценил дека така треба да ја води кампањата и тоа му носи политички поени тоа е негова пресметка, јас би го советувал та да не го прави, туку да се извини – изјави Мицкоски.
Мицкоски посочи дека веројатно Пендаровски така се обраќа на оние на кои мисли дека ќе го гласаат, но тие пораки се шокирачки.
– Неговата порака „очи нема да ви видам во вториот круг ако во првиот не ме гласате” е навистина шокантна и е порака до граѓаните и е порака до граѓаните бидејќи 5 години го немаше, излезе во кампања и сега го гледаме како повторно бара поддршка, а се заканува на граѓаните. Шокиран сум што овие луѓе после 30-годишна политичка кариера испраќаат во јавност вакви пораки – изјави Мицкоски.
