Македонскиот фудбалски репрезентативец Бојан Миовски го запиша својот 20 гол сезонава во сите клупски натпреварувања, погодувајќи во поразот на Абердин од 2:1 на гостувањето во Глазгов кај колидерот Ренџерс во 25. коло од шкотскиот фудбалски Премиершип.
Во дебито на новиот тренер на „црвените“ Нил Ворнок, репрезентативецот на Македонија на истекот од првото полувреме на „Ајброкс“ израмни на 1:1 со својот 13. погодок во елитната конкуренција во Шкотска, со кој се зацврсти на второто место на листата на стрелците.
Пред него е само Шкотланѓанецот Лоренс Шанкланд од Хартс со 16.
Пред пет дена 24-годишниот македонски напаѓач погоди и против другиот гигант од Глазгов и исто така лидер Селтик, во ремито 1:1 во Абердин, а противничката мрежа ја затресе седум пати во последните осум натпревари.
