Кремљ денеска соопшти дека поврзаноста меѓу Украина и осомничениот напаѓач во обидот за атентат врз поранешниот американски претседател, Доналд Трамп, покажува дека „играњето со оган“ има последици, пренесе Хина.
– Не сме ние тие што треба да размислуваме, туку американските разузнавачи. Во секој случај, играњето со оган има последици – изјави портпаролот на Кремљ, Дмитриј Песков, откако беше запрашан за тоа што ФБИ го нарече атентат врз Трамп.
Коментарот се однесуваше на поддршката што САД ѝ ја даваат на Украина во војната против Русија.
Си-Ен-Ен, Фокс Њуз и Њујорк Тајмс го идентификуваа осомничениот како 58-годишниот Рајан Весли Роут од Хаваи, повикувајќи се на неименувани безбедносни службеници.
Три профили на социјалните мрежи со името на Рут сугерираат дека тој бил жесток поддржувач на Украина во нејзината војна против Русија.
Њујорк тајмс објави дека го интервјуирал Рут во 2023 година за напис за Американците кои доброволно се пријавиле да им помогнат на украинските воени напори.
Рут за Тајмс изјави дека отпатувал во Украина и таму поминал неколку месеци во 2022 година и дека се обидувал да регрутира авганистански војници, кои избегале од талибанците, за да се борат во Украина.
Украинскиот претседател Володимир Зеленски денеска го осуди обидот за атентат врз републиканскиот претседателски кандидат и рече дека политичкото насилство е секогаш неприфатливо.
– Мило ми е што слушам дека Доналд Трамп е безбеден и неповреден. Ги испраќам моите најдобри желби до него и неговото семејство – наведе Зеленски на социјалната платформа Икс.
