Откако беше објавено дека кралицата Камила ќе се повлече од јавните ангажмани поради инфекција на дишните патишта, од Бакингемската палата доаѓаат нови информации со надеж за нејзино брзо закрепнување.
Само еден ден по соопштението дека кралицата ќе пропушти неколку настани, вклучувајќи го и отворањето во Вестминстерската Опатија, како и приемот во Бакингемската палата за олимписките и за параолимписките спортисти, беше ажуриран нејзиниот распоред.
Според високи претставници од палатата, Камила во моментот се одмора дома по препорака на докторите, но се надева дека ќе биде способна да се врати на своите обврски до крајот на неделата. Доколку закрепне, се очекува повторно да се појави на јавни настани на почетокот на следната недела, пишува британски Експрес.
Палатата соопшти дека во вторник кралицата Камила ќе биде домаќин на прием во Кларенс Хаус за авторите кои се во потесниот избор за годинешната награда „Букер“. За време на настанот, Едмунд де Ваал, претседател на жирито, ќе одржи краток говор, а Камила ќе ги поздрави номинираните, посакувајќи им среќа пред објавувањето на победникот подоцна истата вечер.
