Кина го повика НАТО „да престане да ја префрла вината“ за војната во Украина, откако генералниот секретар на западната воена алијанса го обвини Пекинг дека го влошува конфликтот со поддршката за Русија, пишува Гардијан.
Генералниот секретар на НАТО, Јенс Столтенберг, вчера изјави дека Кина треба да се соочи со последици за, како што го нарекоа американските власти, големи извозни напори за обнова на руската одбранбена индустрија.
Министрите за надворешни работи на Г7 изразија „силна загриженост“ поради трансферот на материјали со двојна употреба и компоненти за оружје од кинески компании во Русија што Москва ги користи за воено проширување.
Пекинг денеска реагираше на изјавите на Столтенберг, велејќи дека НАТО „треба да се вклучи во саморефлексија, а не самоволни клевети и напади врз Кина“.
„Го советуваме (НАТО) да престане да ја префрла вината и да сее раздор, да не долева масло на огнот и да поттикнува конфронтација, туку да направи нешто практично за политичко решение на кризата“, изјави за новинарите портпаролот на кинеското Министерство за надворешни работи, Лин Џијан.
Рускиот претседател Владимир Путин ја претстави големата инвазија на Москва на Украина, која тој ја опишува како специјална воена операција, како одбранбен потег против проширувањето на НАТО.
