Поранешната специјална обвинителка Катица Јанева на социјалната мрежа Фејсбук објави дека се вработила во адвокатската канцеларија на нејзиниот син Лазар Јанев. Објавата предизвика лавина различни реакции.
Информацијата ја потврди за Плусинфо самиот Лазар Јанев, кој рече дека неговата мајка ќе работи од далечина на правни и консултантски работи за кои не е потребно да биде присутна.
Лазар Јанев беше вработен како менаџер во поранешната телевизија 1ТВ на шоуменот и водител Борјан Јовановски Боки 13, кој беше осуден во случајот „Рекет“, исто како и специјалната обвинителка Катица Јанева.
Во 2021 година Боки 13 беше осуден на 9 години затвор за примање награда за противзаконско влијание и за перење пари, а Јанева на 7 години за злоупотреба на службената положба и овластување како специјална јавна обвинителка.
Јанева ја издржува казната во КПУ Идризово, каде што по извесно време од издржувањето на казната беше вработена како библиотекарка во затворската библиотека.
Според нејзиниот фејсбук-профил Јанева користела викенд-отсуство од затворот од петокот 9 февруари и го прославила својот 59. роденден во домашна атмосфера.
