Израел се подготвува за потенцијално голема ескалација во конфликтот со Иран, откако американските разузнавачи процениле дека Техеран би можел да нареди напад врз воени и владини цели во еврејската држава во наредните денови, пишува Телеграф. сè
Израелските министри најавија дека доколку Техеран преземе директна воена акција, ќе одговорат со свои напади на иранска територија, отворајќи ја вратата за голема регионална војна на Блискиот Исток.
Во проценката на американското разузнавање објавена деновиве од Блумберг, се наведува дека Иран е подготвен да изврши прецизни напади со балистички ракети или со беспилотни летала против цели во Израел. Извор цитиран во извештајот вели дека прашањето е „кога, а не дали“ Иран ќе нападне, иако не е јасно дали Техеран ќе преземе директна акција или ќе се потпре на својата мрежа на сојузници.
Во секој случај, извештајот на Блумберг сугерира дека Иран развива планови за напад само на воени и владини локации во Израел, од кои најзначајна би била Кирија, израелскиот воен штаб во Тел Авив.
Други потенцијални цели вклучуваат воздушни бази, како што се оние во Палмахим во централен Израел или Мерон на север, како и Кнесетот (израелскиот парламент) и кабинетот на премиерот во Ерусалим.
Ако Иран преземе чекор и директно го нападне Израел – потег што би бил многу невообичаен за врховниот водач Али Хамнеи, дури и во светло на актуелната криза – тој веројатно би се потпирал на балистички ракети и/или роеви со беспилотни летала, проценуваат експертите.
Експертите за иранскиот режим се крајно скептични во врска со можноста за директен напад од Иран, бидејќи тоа ќе стави крај на долгогодишната политика на поттикнување конфликт со Израел преку тајни напади. Но, тие исто така посочија дека иранското раководство ќе биде под притисок да покаже сила како одговор на израелскиот напад врз иранскиот конзулат во Дамаск.
– Режимот во целина е генерално претпазлив и избегнува директна конфронтација, но тие беа испровоцирани повеќе од вообичаено. Израелскиот напад минатата недела во Дамаск, Сирија дефинитивно ќе создаде чувство за потребата да се одмазди… – проценува Стивен Вагнер, виш предавач по меѓународна безбедност на Универзитетот Брунел.
Директен напад од иранска територија би претставувал чин на војна против Израел и, според некои, би бил претерана реакција на нападот во Дамаск – чија цел беа иранските сили во странство, а не цели во самиот Иран.
– Кинетичкиот напад со балистички ракети или беспилотни летала против израелски цели дома ќе биде највлијателната и најризичната опција на располагање на Техеран – рече Џонатан Паникоф, директор во Атлантскиот совет, во неодамнешната безбедносна проценка.
Друго сценарио, повеќе во согласност со однесувањето на Иран во минатото, би било да се нареди на сојузничката група во јужен Либан или Сирија, како што е Хезболах, да изврши масовни ракетни или беспилотни напади преку границата со Израел.
