Иран е подготвен да ги реши отворените спорови околу неговата нуклеарна програма, но нема да подлегне на притисокот додека европските земји вршат притисок за дипломатија пред враќањето на Доналд Трамп во Белата куќа, изјави иранскиот министер за надворешни работи, Абас Аракчи, во четвртокот, објави Ројтерс.
„Топката е на теренот на ЕУ/Е3“, напиша Аракчи на платформата Икс по разговорите во Техеран со шефот на Меѓународна агенција за атомска енергија (МААЕ), Рафаел Гроси.
Неговата објава се однесува на трите европски земји – Франција, Велика Британија и Германија – кои го претставуваат Западот заедно со САД во нуклеарните разговори.
„Подготвени сме да преговараме врз основа на нашиот национален интерес и неотуѓиви права, но не сме подготвени да преговараме под притисок и под заплашување. Се надевам дека другата страна ќе усвои рационална политика“.
Техеран има сериозна намера да го реши својот нуклеарен ќор-сокак
Висок ирански претставник изјави за Ројтерс дека Техеран ќе испрати порака до трите европски сили за сериозната намера на Техеран да го реши својот нуклеарен ќор-сокак, истовремено нагласувајќи дека секој притисок врз Техеран ќе има спротивен ефект.
Враќањето на Трамп на функцијата претседател на САД, во јануари, ја нарушува нуклеарната дипломатија со Иран која беше во застој под администрацијата на Џо Бајден во заминување по неколкумесечни индиректни разговори.
Нова резолуција против Иран?
Дипломати изјавија за Ројтерс во средата дека Велика Британија, Франција и Германија се залагаат за нова резолуција против Иран од страна на одборот на Меѓународната агенција за атомска енергија следната недела за да го притиснат Техеран поради, како што тие сметаат, неговата лоша соработка.
Враќањето на Трамп на функцијата претседател на САД, во јануари, ја нарушува нуклеарната дипломатија со Иран која беше во застој под администрацијата на Џо Бајден во заминување, по неколкумесечни индиректни разговори.
За време на претходниот мандат на Трамп, Вашингтон го отфрли нуклеарниот договор од 2015 година, меѓу Иран и шесте светски сили, со кој се ограничи нуклеарната работа на Техеран во замена за ослободување од меѓународните санкции.
Трамп не објасни целосно дали ќе ја продолжи својата политика на „максимален притисок“ врз Иран кога ќе ја преземе функцијата.
Односите меѓу Техеран и МААЕ се заострија поради неколку долгогодишни прашања, вклучително и поради тоа што Иран им забрани на експертите на агенцијата за збогатување ураниум да влезат во земјата и поради нејзиниот неуспех да ги објасни трагите на ураниум, пронајдени на непријавени локации.
