Судирите на галаксиите пред 12 милијарди години можеле да доведат до формирање на најголемите галаксии во универзумот, покажуваат најновите истражувања.
Астрономите од Универзитетот во Саутемптон го проучуваат овој феномен со цел да ја решат „меѓугалактичката мистерија“ за потеклото на елиптичните галаксии. Овие галаксии, кои изгледаат како заоблени топчиња во споредба со рамниот диск на Млечниот Пат, се во фокусот на истражувањето со децении.
Во студија објавена во списанието Nature, др. Annagrazia Puglisi истакна дека тимот е блиску до одговорот на ова прашање што ги мачи научниците со децении.
„Две диск галаксии се судрија и предизвикаа гас, гориво за формирање на ѕвезди, да тече кон нивниот центар, создавајќи трилиони нови ѕвезди“, напиша таа.
„Овие космички судири се случија пред осум до 12 милијарди години, во период кога универзумот беше во многу поактивна фаза од својот развој. Нашите откритија нè доближуваат до решавање на мистеријата што ќе го редефинира нашето разбирање за формирањето на галаксиите во раниот универзум“.
Тим истражувачи, во соработка со опсерваторијата Purple Mountain и Кинеската академија на науките, анализираа повеќе од 100 галаксии кои формираат ѕвезди во далечните делови на универзумот користејќи го најголемиот радио телескоп во светот, Алма, кој се наоѓа во чилеанската пустина Атакама.
Раководител на студијата, др. Кинг-Хуа Тан од опсерваторијата Purple Mountain рече дека истражувањето користело нова техника за анализа на распределбата на светлината што ја емитуваат далечните и екстремно светли галаксии.
„Ова е првиот вистински доказ дека сфероидните галаксии се формираат директно преку интензивни епизоди на формирање на ѕвезди во јадрата на далечните галаксии. Астрофизичарите со децении се обидуваат да го разберат овој процес“, рече др. Тан.
Според него, овие галаксии се формираат брзо – гасот се вшмукува навнатре за да ги нахрани црните дупки, предизвикувајќи интензивни изливи на формирање на ѕвезди со брзина од 10 до 100 пати поголема од брзината на формирање на ѕвезди во нашиот Млечен Пат.
Научниците планираат да ги комбинираат овие наоди со податоците собрани од телескопите од Џејмс Веб, Евклид и кинеските вселенски станици за да ги мапираат ѕвездените компоненти на галаксиите.
д-р. Пуглиси нагласи: „Овие студии ќе ни овозможат поцелосна слика за формирањето на галаксиите во раниот универзум и ќе го продлабочат нашето разбирање за еволуцијата на универзумот од неговиот почеток“, пренесува Гардијан.
