Францускиот министер за внатрешни работи Жералд Дарманин ја призна грешката во психијатрискиот третман на осомничениот кој со нож усмрти германски турист и рани уште двајца во центарот на Париз во саботата. Во врска со нападот, обвинителството започна истрага за наводен терористички заговор.
„Очигледно беше неуспех, не од страна на разузнавачките служби, туку психијатриска грешка“, изјави Жералд Дарманин за француската телевизија BFMTV, додавајќи дека напаѓачот има „акутна ментална болест“.
„Лекарите повеќепати мислеа дека му оди подобро, дека е нормален и може да биде ослободен“, објасни министерот Џералд Дарманин.
Полицијата уапси 26-годишен француски државјанин со иранско потекло по нападот што се случи во саботата вечерта во близина на Ајфеловата кула. На осомничениот, кој на властите им беше познат како радикализиран исламист, претходно му беше наредено лекување што вклучуваше строг психијатриски надзор, објави француската новинска агенција АФП.
Тој веќе беше уапсен во 2016 година за планирање напад, а заврши со четири години затвор и беше ставен под строг надзор по неговото ослободување.
Како што кажа и Дарманин, мајката на напаѓачот ја предупредила полицијата дека нејзиниот син повеќе не зема лекови, а разузнавачките служби му предложиле да биде хоспитализиран. Но, таа не го сакала тоа и подоцна пријавила дека му оди подобро.
Високиот француски обвинител за борба против тероризмот Жан-Франсоа Рикар во неделата изјави дека осомничениот се заколнал на верност на групата Исламска држава во видео објавено на социјалните мрежи. Обвинителството покрена истрага за убиство и обид за убиство во врска со терористички акт и криминален терористички заговор.
