Претседателот на Меѓународната фудбалска федерација (ФИФА), Џани Инфантино, изјави дека на овогодинешното Светско првенство во женски фудбал приходот бил повеќе од 570 милиони долари.
Инфантино, исто така, рече дека ги отфрлил предлозите за усогласување на наградниот фонд со оној на Светското првенство за мажи.
„Повеќе од половина милијарда. Нема многу натпреварувања, дури ни во машкиот фудбал, кои се рекордни повеќе од половина милијарда“, изјави Инфантино.
Шефот на ФИФА додаде дека барањата за еднакви наградни пари „нема да решат ништо“.
Наградниот фонд за Светското првенство за жени е 110 милиони долари, додека наградите за фудбалерите се 440 милиони долари.
Првиот човек на светската фудбалска организација ги повика радиодифузерите и спонзорите „да платат фер цена“ за женскиот фудбал – „во сите земји, во сите лиги и за сите натпреварувања“.
Светското првенство за жени годинава се одржува во Австралија и Нов Зеланд. Во сабота во Бризбејн ќе се сретнат Шведска и Австралија во борба за третото место (10 часот), додека финалето меѓу Шпанија и Англија ќе се игра во недела во Сиднеј од 12 часот.
