Известувајќи за вчерашниот пакет за проширување на ЕУ, Фајненшл тајмс (ФТ) наведува дека немало премногу изненадувања, а Европската комисија препорачала земјите-членки да ги отворат преговорите со Украина и Молдавија веднаш штом ќе ги исполнат наведените услови. Но, се нагласува дека Босна и Херцеговина била „уште еден неочекуван победник“, а претседателката на Европската комисија Урсула фон дер Лајен изјавила: „Вратата е ширум отворена“.
Според дописникот на ФТ од Брисел, „стариот австроунгарски блок помогна да се унапреди кандидатурата на БиХ за членство во ЕУ“. Имено, „поделената земја која беше зафатена од брутална граѓанска војна во 1990-тите вчера беше истуркана на патот кон членство во ЕУ со поддршка на колегите поранешни членови на семејството Хабсбург: Австрија, Хрватска и Словенија“, изјави дописникот на ФТ, Енди Баунд. .
Словенечката министерка за надворешни работи Тања Фајон изјави за ФТ дека комисијата „ја препознала геостратешката неопходност од проширување“ по „гласното“ лобирање од Љубљана. Таа додаде дека, иако БиХ исто така мора да ја заврши својата домашна задача, „Европа ќе биде уште постабилна, побезбедна и попросперитетна кога ќе заврши проширувањето на ЕУ“.
Но, во ова не се убедени сите 27 членови.
Според ФТ, еден дипломат, коментирајќи ја изјавата на Фон дер Лејен, рекол: „Тоа е многу мала врата и има многу големо куче пред неа“.
„Украина и Молдавија го направија она што требаше да го направат. Босна и Херцеговина не направи ништо. Но нивниот случај го туркаат три земји-членки“, изјави овој неименуван дипломат.
Тој истакна дека иако Украина и Молдавија наскоро би можеле да започнат преговори за пристап само со неколку отворени услови, БиХ може да го стори тоа само „штом ќе се постигне потребниот степен на усогласеност со критериумите за членство“.
ФТ наведува дека главниот проблем на БиХ е тоа што, додека ентитетот на Федерацијата се обидува да ги исполни своите цели за членство во ЕУ, ентитетот на Република Српска „флертува со Русија и се заканува со отцепување“.
Се известува дека европскиот комесар за проширување и соседство, Оливер Вархеји, од Унгарија, на парламентарната комисија за надворешни работи изјавил дека претседателот на ентитетот на РС, Милорад Додик, ја кочи Босна со „сецесионистичка реторика“, но дека тој е конструктивен за влез во националната влада.
Томас Вејц, претставник на Зелените, го предупреди Додик: „Не можете да седите на две столчиња во исто време“. Не можете да ја изразите својата волја за влез во ЕУ додека го посетувате рускиот министер за надворешни работи“.
