Американскиот претседател Џо Бајден, првата дама Џил Бајден и околу 2.000 обожаватели во петокот уживаа во настапот на музичката легенда и активист Елтон Џон, кој моментално е на долга проштална турнеја низ САД, на јужниот тревник на Белата куќа.
Британската суперѕвезда под отворено небо во придружба на хор изведе хитови како „Rocketman“, „Your Song“ и „Tiny Dancer“, што во еден момент го расплака Бајден.
„Како и многу други Американци, нашето семејство ја сака неговата музика“, рече Бајден претставувајќи го пејачот.
„Може да се каже дека музиката на Елтон Џон ни ги промени животите“, додаде тој.
Музичарот, кој одби да настапи на инаугурацијата на поранешниот претседател Доналд Трамп, се согласи да настапи за семејството Бајден. Тој е една од ретките познати ѕвезди кои по долги години се вратија во Белата куќа.
Неговиот настап беше дел од прославата во чест на луѓето што Белата куќа ги нарече секојдневни херои: медицински сестри, работници за итни случаи, наставници, ЛГБТК+ застапници и активисти.
Елтон Џон изјави дека настапот во Белата куќа е „шлаг на тортата“ на кариерата во која имал можност да настапува во прекрасни сали ширум светот.Помеѓу песните, тој зборуваше за неговата борба против ХИВ/СИДА и го пофали поранешниот претседател Џорџ В. Буш, републиканец, за неговите напори да се бори против СИДА-та во Африка преку Фондот за итна помош на претседателот на САД. СИДА (PEPFAR).
