Резервоар за гориво се запали во рафинерија за нафта во близина на рускиот град Воронеж, соопшти локалниот гувернер.
„На терен се повеќе од 100 пожарникари и 30 возила, според првичните податоци нема жртви“, рече тој.
Причината за пожарот не е објавена, но на снимките од социјалните мрежи се гледа како воен хеликоптер лета во близина на рафинеријата во моментот на експлозијата, јавува Си-Ен-Ен.
Според други видеа, во областа биле борци од паравоената група Вагнер, која се побунила против Кремљ.
Руските државни медиуми објавија видео снимки од блокираните патишта околу Воронеж, кои наводно Вагнерците ги користеле од правец на Ростов на Дон. Воронеж е на половина пат помеѓу Ростов на Дон и Москва.
