Голема спасувачка операција е во тек во близина на јужниот грчки остров каде доцна во средата потона едрилица со околу 100 мигранти, соопштија властите.Крајбрежната стража соопшти дека нејзините бродови, приватни чамци и спасувачки хеликоптер биле вклучени во потрагата покрај брегот на островот Китира, јужно од полуостровот Пелопонез.
Официјалните лица немаа детали за бројот на спасени или исчезнати луѓе, но рекоа дека едрилицата удрила во карпа на источната страна на островот. Ветровите во областа дуваа со брзина и до 70 километри на час.
Повеќето мигранти во Грција патуваат од соседна Турција. Шверцерите ги сменија рутите во последните месеци во обид да ги избегнат патролираните води околу грчките острови во близина на турскиот брег.
Китира е 400 километри западно од Турција, на рута која често ја користат шверцерите за целосно да ја заобиколат Грција и да отпловат директно до Италија.
