Дванаесет лица се повредени по турбуленции на летот на Катар ервејс од Доха до Даблин во неделата, јавува Си-Ен-Ен.
Авионот, кој слета во Даблин нешто пред 13 часот по локално време, го пречекаа службите за итни случаи, вклучително и аеродромската полиција и противпожарната и спасувачката служба.
Според соопштението на аеродромот во Даблин, во инцидентот се повредени шест патници и шест членови на екипажот. Летот QR107 на „Катар ервејс“ доживеа турбуленции додека летал над Турција, се вели во соопштението.
Аеродромот во Даблин соопшти дека им помага на патниците и персоналот и дека настаните околу овој лет не влијаеле на другите операции.
Турбуленциите доаѓаат само неколку дена откако 104 патници беа повредени, а маж почина со срцева болест на летот на Сингапур ерлајнс погоден од силни турбуленции.
Летот SQ321 од Лондон до Сингапур кружел на височина од 11 километри во вторникот кога авионот ненадејно ја изгубил височината пред да се искачи неколку стотини метри. Тој потоа се спушти и се искачи неколку пати, според Си-Ен-Ен.
