Украинската разузнавачка служба била вмешана во смртоносниот терористички напад на концертната сала Крокус Сити Хол во Москва во март годинава, изјави денеска директорот на руската Федерална служба за безбедност (ФСБ) Александар Бортников.
– Украинските и западните разузнавачки служби го прошируваат кругот на можни сторители регрутирани за извршување злосторства од висок профил во Русија – рече Бортников за време на он-лајн состанокот на Националниот антитерористички комитет (НАК), пренесе Раша тудеј.
Бортников истакна дека Киев и неговите странски поддржувачи, им помагаат на меѓународните терористички организации кои ги обучуваат и обезбедуваат опрема за нив.
– Вистински пример за такви активности е вмешаноста на украинската воена разузнавачка служба во терористичкиот напад на Крокус Сити Хол во близина на Москва, што го утврдивме – нагласи шефот на ФСБ, додавајќи дека главните цели на украинското западно разузнавање се помладите луѓе и работниците мигранти.
Во нападот на Крокус Сити Хол во предградието на Москва извршен на 22 март, загинаа 145 лица, а повеќе од 550 беа повредени.
Четворица вооружени напаѓачи упаднаа во зградата пред концерт, отворајќи оган врз толпата пред да ја запалат.Осомничените сторители, сите државјани на Таџикистан, биле приведени веднаш по нападот додека се обидувале да побегнат со автомобил кон украинската граница.
Оттогаш, речиси десетина нивни соучесници се уапсени. Одговорноста за нападот ја презеде терористичката Исламска држава.
Сепак, Москва сугерираше дека Киев ја користи исламистичката група како свој „застапник“. Украина негираше каква било вмешаност, додека Западот инсистираше на тоа дека сите докази укажуваат на ИСИС како единствен виновник.
