Детскиот фонд на Обединетите нации (УНИЦЕФ) ги повика сите страни да се воздржат од воена ескалација во Рафах, на крајниот југ од Појасот Газа, предупредувајќи дека таму се сместени повеќе од 600.000 деца, од кои некои се раселени повеќе пати од почеток на војната.
Извршниот директор на УНИЦЕФ Кетрин Расел изјави доцна синоќа дека воената ескалација во Рафах ќе означи „уште еден разурнувачки пресврт“ во војната во која досега загинаа повеќе од 27.000 луѓе, според здравствените власти во Газа.
Таа рече дека уште илјадници луѓе би можеле да умрат во насилството или да умрат од недостаток на основни потреби и дека хуманитарната помош може дополнително да биде отежната.
„Потребни ни се последните преостанати болници, засолништа, продавници и системи за вода во Газа да останат функционални. Без нив гладот и болеста ќе ескалира и повеќе деца ќе умрат“, вели Расел.
Повеќе од половина од вкупното население на Газа од 2,3 милиони побегнале во Рафа, по израелската наредба за евакуација, пред да се прошири копнената офанзива.
Сега има наредби за евакуација на две третини од територијата на опколената мала енклава.
Расел апелираше до сите страни во конфликтот да ги почитуваат своите обврски засновани на меѓународното хуманитарно право, кое вклучува грижа за заштита на цивилите и цивилната инфраструктура.
Израелските воздушни напади врз центарот на Газа и Рафа на југ, на границата со Египет, продолжија во ноќта меѓу четвртокот и петокот. Во нив загинаа повеќе од 20 луѓе, меѓу кои и жени и деца, изјавија очевидци и болнички службеници.
Нападите продолжија и откако американскиот претседател Џозеф Бајден во четвртокот рече дека ги смета дејствијата на Израел во оваа војна за претерани.
