Повеќето од нас ги одбројуваат деновите до секој викенд, кога ќе дремеме малку подолго и ќе го надоместиме изгубениот сон. Но, новото истражување покажа дека дури и 90 минути лежење за време на викендот произведува цревни бактерии поврзани со срцев удар, мозочен удар и дебелина.
Револуционерна нова студија објавена во The European Journal of Nutrition ја истражува врската помеѓу спиењето, цревниот микробиом и целокупното здравје. Претходно беше познато дека лошите навики во исхраната и работата во смени може сериозно да му наштетат на здравјето, но новото истражување открива дека дури и малите промени во режимот на спиење можат да имаат големо влијание.
Студијата на 934 луѓе откри фасцинантна поврзаност помеѓу навиките на спиење и здравјето. Луѓето со неправилни шеми на спиење, дури и со само 90-минутна разлика помеѓу распоредот за спиење во недела и викенд, покажаа значително повеќе маркери на воспаление, што укажува на полошо здравје, пишува The Sun.
Сè поголем број докази сугерираат дека составот на цревните микроби игра клучна улога за здравјето на луѓето, влијаејќи на сè, од варење до ризик од сериозни болести. Студијата идентификувала дури 17 видови бактерии во цревата, чии нивоа се разликувале во зависност од конзистентноста на шемите на спиење. Посебно загрижувачки се резултатите поврзани со „социјалниот џет-лаг“, каде учесниците имале тенденција да спијат подоцна за време на викендите. Девет од овие бактерии биле почесто присутни кај луѓе со вакви навики на спиење, а три биле поврзани со дебелина, лошо кардиометаболно здравје и повисоки нивоа на воспаление и ризик.
„Знаеме дека големите нарушувања на спиењето, како што е работата во смени, може да имаат големо влијание врз вашето здравје. Ова е прва студија која покажа дека дури и малите разлики во времето на спиење во текот на неделата се поврзани со разликите во типовите на цревните бактерии. Некои од овие асоцијации беа поврзани со разлики во исхраната, но нашите податоци исто така укажуваат на тоа дека може да бидат вклучени и други, сè уште непознати фактори“, рече Венди Хол од Кралскиот колеџ во Лондон.
