Јаболковиот оцет е здрава храна и се верува дека го забрзува слабеењето. Највообичаен начин да се практикува диета со јаболков оцет е да се испие една лажичка до две лажици јаболков оцет измешан со два децилитри вода наутро на празен стомак. Но, дали навистина функционира диетата со јаболков оцет?
Вистина е дека не постојат цврсти научни докази дека јаболковиот оцет го забрзува метаболизмот или ги топи мастите или дека помага при слабеење, пишува Задовољна.хр.
Затоа, пред да почнете да пиете јаболков оцет, прочитајте пет факти за оваа кисела храна кои треба да ги знаете.
1. Јаболковиот оцет не е најдобриот потиснувач на апетитот
Кога пиете јаболков оцет на празен стомак, киселината може да го иритира желудникот и на тој начин да создаде чувство на ситост. Доколку сакате да се чувствувате сити без можни штетни несакани ефекти, подобар избор би бил појадокот богат со протеини. Таков здрав појадок ќе ве засити и ќе ви обезбеди многу повеќе хранливи материи од чаша вода со јаболков оцет. Здрав појадок ќе биде, на пример, јајца и грчки јогурт.
2. Пиењето јаболков оцет не е природен начин на детоксикација
Нашето тело веќе има свој природен систем за чистење од токсините, кој се состои од црниот дроб, бубрезите и цревата. Овие витални органи му помагаат на телото да ги апсорбира хранливите материи и да ги елиминира бескорисните материи во форма на урина и столица.
3. Јаболковиот оцет може да биде пробиотик, но…
Јаболковиот оцет е дериват на ферментиран сок од јаболко, па како и другите ферментирани намирници, може да содржи бактерии кои го промовираат здравјето на цревата и одржуваат правилно варење. Но, треба да се има предвид дека својствата на пробиотиците имаат само непастеризираниот јаболков оцет, кој содржи ензими, протеини и споменатите пробиотици. Така, пастеризацијата ги исчезнува пробиотските својства на јаболковиот оцет.
4. Пиењето премногу јаболков оцет може да биде опасно
Ако одлучите да се обидете да ослабете со помош на јаболков оцет, не консумирајте повеќе од две лажици дневно. Премногу јаболков оцет може да го иритира желудникот, но исто така може да ја уништи забната глеѓ и да го оштети хранопроводникот. Затоа се препорачува да не пиете јаболков оцет на празен стомак.
5. Јаболков оцет може да биде покорисен за јадење отколку за пиење
Најдобар начин за консумирање на јаболков оцет е како зачин за салата. На овој начин ќе имате најголема корист од тоа бидејќи не постојат цврсти научни докази за тврдењата дека пиењето јаболков оцет помага при слабеење. Запомнете дека нема брзи решенија кога станува збор за трајно губење на тежината. Усвојувањето на здрав начин на живот е единствениот правилен пат до витка линија.
Ако консумирате јаболков оцет, важно е да ги следите упатствата подолу:
– Ограничете го внесот (почнете со мала количина и зголемете го до максимум две лажици дневно, секогаш разредени во вода)
– намалете ја изложеноста на забите на киселина (ова можете да го направите со пиење разреден оцет со слама)
– исплакнете ја устата (откако ќе испиете оцет, исплакнете ја устата со вода)
– внимавајте на алергиите (иако алергиите на јаболков оцет се ретки, доколку почувствувате алергиска реакција, веднаш престанете да го земате и обратете се кај вашиот лекар).
