„Пред три дена Владимир Путин го уби мојот сопруг Алексеј Навални. Путин го убил таткото на моите деца. Со него (Путин) сакаше да ја убие нашата надеж, нашата слобода, нашата иднина“.
Вака изјави во обраќање на Јутјуб вдовицата на рускиот опозиционер Навални, Јулија Навалнаја.
– Мојот сопруг не можеше да биде скршен, затоа Путин го уби – смета Јулија.
Гласната поддршка која Јулија ја доби од западните челници, како и нејзините пораки предизвикаа прашина. Германски Билд во свој напис прашува дали сега нејзиниот живот е во опасност.
„Дали Путин сега треба да трепери пред неа? Дали Јулија Навалнаја ќе биде гласот на руската опозиција? А ако сака и таа ќе биде мета на Путин?“, се вели во текстот на Билд.
Јулија во саботата во Минхен најави дека ќе ја продолжи работата на нејзиниот сопруг. Во меѓувреме, таа се состанува со највисоките претставници на Европската унија додека САД и ЕУ продолжуваат да ги разгледуваат мерките против Русија поради смртта на Навални.
Таа изјави дека ќе работи во корист на граѓаните на Русија за да се бори против Кремљ и да создаде „нова Русија“.
Високиот претставник на ЕУ за надворешна политика и безбедност Жосеп Борел рече дека Јулија Навални ќе присуствува на состанокот на министрите за надворешни работи на ЕУ во Брисел за да даде „порака за тоа како да се поддржи политичката опозиција во Русија против режимот на Путин“.
Земјите-членки „сигурно“ ќе предложат санкции против Русија, рече тој.
