Поројните поплави кои ги пустошат Грција, Бугарија, Турција и Шпанија досега однесоа неколку животи. Тие предизвикаа големи разурнувања, затворени се многу патишта, а евакуирани се станбени згради и туристички области.
Силно невреме и поплави што ги погодија Шпанија, Грција, Турција и Бугарија во вторникот однесоа повеќе животи.
Двајца туристи загинаа во Турција
Меѓу жртвите од поплавите во Турција има и двајца туристи кои летувале во камп во северозападниот дел на земјата, пренесува Euronews. Турскиот министер за внатрешни работи Али Јерликаја изјави дека уште четири лица се водат како исчезнати. Тие беа и во кампот во регионот Киркларели кога беше погоден од поплави.
Поплави се пријавуваат од Истанбул, каде поради обилните врнежи под вода се две населби. Најмалку две лица загинаа. Од градската библиотека поради навлегување вода мораа да бидат извлечени и околу 12 лица, а затворени се и некои станици на метрото.
Градоначалникот на Истанбул, Екрем Имамоглу, истакна дека поради климатските промени Турција мора да се подготви за се поекстремни временски настани.
Според синоптичарите, невремето ќе продолжи на запад и југозапад од Турција, па предупредуваат за нови поплави.
Во Грција денеска се очекува да престанат обилните врнежи од дожд
Со големи поплави се бори и во Грција, од каде што се пријавени најмалку двајца загинати. Пет лица се водат како исчезнати, однесени од бесната вода. Обилните врнежи во Грција продолжија доцна во ноќта и до утринава.
Во грчкиот град Волос во планинскиот регион Пелион и на туристичкиот остров Скиатос, властите го запреа целиот сообраќај.
Во областа Пелион, каде што во вторникот наврнаа меѓу 450 и 600 литри дожд на метар квадратен, најобилни од 2006 година, потоците се излеаја од коритата и ги однесоа автомобилите во морето, додека одроните на камења ги блокираа патиштата. Излеан е и мал мост, а многу области се уште се без струја. Властите превентивно го евакуирале домот за стари лица во градот Волос, пренесува Euronews.
Покрај тоа, грчките власти ги предупредија луѓето во неколку други области на централна Грција, островите Споради и островот Евбеја да го ограничат движењето на отворено.
Грчкиот министер за климатски кризи и цивилна заштита Василис Кикилијас изјави дека обилните дождови треба да престанат денеска.
Жртви и во Бугарија
Силни поплави ја зафатија и Бугарија, особено јужниот брег на Црното Море, пишува Индепендент. Премиерот Николај Денков соопшти дека најмалку две лица загинале, а уште три се водат како исчезнати.
Надојдените реки сериозно ги оштетија патиштата и мостовите. Областа остана без струја, а властите ги предупредија жителите да не пијат вода од чешма поради контаминација на водата од поплавите.
Невремето и силниот ветер предизвикаа високи бранови кои ги поплавија крајбрежните области. Во одморалиштето Царево морето однело автомобили и моторни куќи. Затоа властите ги повикаа туристите да се преселат на повисоките места.
Во Шпанија спасено е момче кое осум часа било на дрво
Со поплави се борат и во Шпанија, каде минатиот викенд веќе имаа рекордни количества дожд. Според официјалните податоци, таму загинале најмалку пет лица. Меѓу нив имало и двајца алпинисти во област во провинцијата Хуеска кои биле зафатени од силно невреме.
Спасувачите се уште трагаат по уште исчезнати лица, но во понеделникот спасија десетгодишно момче од Шпанија од дрво, пишува Гардијан. Тој и неговото семејство го поминаа летото во семејната викендичка на западниот дел на Мадрид. Семејството било зафатено од поплава додека биле во својот автомобил. Потоа било однесено, а по осум часа момчето било пронајдено живо, со само неколку модринки, прилепено за дрво.
Спасувачите ги пронашле и неговата мајка и сестра, додека нивниот татко се уште се води како исчезнат.
Поради улов, во неделата беше откажан и фудбалскиот натпревар помеѓу екипите Атлетико Мадрид и Севиља. Затворени се и неколку линии на метрото во Мадрид.
