Американскиот претседател Џозеф Бајден денеска изјави дека последниот, масовен напад на Русија врз Украина е „остар потсетник за светот дека, по две години од оваа разорна војна, целта на Путин останува непроменета“, пренесува Би-Би-Си.
Во изјавата, Бајден го повика американскиот Конгрес да побрза и „да дејствува без дополнително одлагање“ по масовните бомбардирања во Украина.
-Доколку Конгресот не дејствува итно во новата година, повеќе нема да можеме да испраќаме оружје и витални противвоздушни системи што ѝ се потребни на Украина за да го одбрани својот народ. Не можеме да ја изневериме Украина. Историјата строго ќе им суди на оние кои нема да одговорат на повикот за слобода – рече американскиот претседател.
Белата куќа оваа недела одобри уште 250 милиони долари американска воена помош за Украина, но ова е последната транша што може да се даде без ново одобрение од Конгресот, пишува Би-би-си.
Избраните претставници на Републиканската и Демократската партија на САД сè уште преговараат за потврдување на пакетот помош во износ од 61 милијарда долари, на кој инсистираа Бајден и неговиот украински колега Влoдимир Зеленски, потсетува АФП.
Но, речиси две години од почетокот на исцрпувачката војна – и откако Конгресот веќе испрати повеќе од 110 милијарди долари – особено Американците, особено републиканците, почнуваат да реагираат дека сметката е превисока.
Својата понатамошна поддршка за испраќање помош за Украина тие сега ја условуваат со драстично заострување на американската миграциска политика.
Преговорите сè уште траат, но како што пишува Би-Би-Си, тие се во застој.
Утрово Москва изврши голема серија ракетни и беспилотни напади врз неколку поголеми градови во Украина, вклучително и главниот град Киев, при што загинаа 30 лица, а 132 беа повредени, соопштија властите во земјата.
