Познатиот шпански тенисер Рафаел Надал нема да се израдува кога ќе слушне дека ниту неговите сонародници не го сметаат за најдобар тенисер на сите времиња! Шпанецот Карлос Алкараз, кој неодамна го победи Новак Ѓоковиќ во финалето на Вимблдон, јавно изјави дека верува оти Србинот е најдобриот тенисер што некогаш играл.
Иако Надал и Алкараз се многу блиски, толку многу што заедно ќе играат двојки на претстојните Олимписки игри во Париз, Алкараз не сакаше да го стави Надал пред Новак.
– Кога ќе ги погледнете бројките, Новак Ѓоковиќ е најдобриот на сите времиња. Другите двајца, Роџер Федерер и Рафаел Надал, исто така се на врвот за мене – рече Алкараз на прашањето кој е Г.О.А.Т, кратенка што значи најголемиот на сите времиња, „грејтест оф ол тајм“.
Што се однесува до Надал, тој беше еден од првите кои му честитаа на Алкараз за победата на Вимблдон, а на прашањето што мисли за неговиот сонародник, тој истакна дека верува оти Алкараз може да стане најголемиот досега ако го заобиколат повредите.
