Рускиот претседател Владимир Путин и неговите послушници веќе смислиле план за бегство од земјата штом работите ќе тргнат наопаку, вели поранешен помошник на рускиот лидер.
Абас Галијамов, кој своевремено пишуваше говори за Путин, го изјави шокантното тврдење на социјалната мрежа Телеграм во средата, повикувајќи се на неименуван извор за кој Галијамов тврди дека има инсајдерски информации за целиот план.
Галијамов вели дека планот за евакуација бил смислен пролетта, кога неофицијално бил наречен „Ноевата арка“.
„Самото име сугерира дека тоа е потрага по нов дом во случај животот во татковината да стане неподнослив. Следбениците на лидерот не ја исклучуваат можноста тој да ги загуби војната и моќта и да мора итно да побегне“, напиша Галијамов, пренесува Дејли Бист.
Според Галијамов, најблискиот круг на Путин првично размислувал за евакуација во Кина, но подоцна се предомислил, плашејќи се дека шансите за кинеска „соработка“ ќе бидат мали, особено што Кинезите не трпат „губитници“. Сега, вели тој, фокусот е префрлен на Аргентина и Венецуела, а сојузникот на Путин, Игор Сечин, наводно моментално го надгледува планот за евакуација на Венецуела.
Планот е веќе во напредна фаза, тврди Галијамов, до тој степен што најблискиот соработник на Сечин во Рознефт веќе „формално се повлекол“ од позицијата во нафтениот гигант за да се занимава со „работа на терен“.
Цитирајќи два извори блиски до претседателската администрација, како и извор во Рознефт, каналот Телеграм наведува и дека високи функционери веќе почнале да купуваат недвижен имот и работат на добивање права за престој во Венецуела. Оние кои се пониски рангирани во претседателската администрација бараат престој во Еквадор, Парагвај и Аргентина, се вели во извештајот.
Каналот цитира еден од изворите дека руските власти купувале имоти на островот Маргарита во Венецуела, каде што веруваат дека ќе бидат безбедни од екстрадиција.
„Островот Маргарита во Венецуела е нивниот Куршевел таму“, наводно рекол изворот, споредувајќи го наводното скривалиште на Кремљ со познато скијачко одморалиште на француските Алпи.
Признавајќи дека нема дополнителни детали, Галијамов рече дека самиот факт дека постои план за евакуација „доволно е да се разбере дека кога велат дека „се оди според планот“, треба да прашате по кој план. Се чини дека имаат повеќе од една“.
Тој ги изнел овие бомбастични тврдења додека рускиот лидер се обидува да ги минимизира извештаите за рекордно ниските нивоа на мотивација меѓу руските трупи кои се заситени од војната, само девет месеци по нејзиното започнување. Во последните недели се појавија голем број извештаи за регрути кои масовно бегаат од базите, откако нивните поплаки за лошата опрема беа целосно игнорирани. Членовите на семејствата на мобилизираните војници, исто така, се повеќе ја критикуваат таканаречената „специјална воена операција“, поради што некои експерти велат дека тоа би можело да биде последната капка што води до целосна граѓанска војна.
Ако е да се слуша Путин, тогаш се е во ред.
„Нема проблем со дезертерството во зоната за специјални воени операции. Имаше изолирани инциденти, но генерално такво нешто не се случува. Дали има луѓе кои ги напуштиле своите позиции? Да, имаше, но тоа се случува сè помалку“, изјави Путин во средата на состанокот со членовите на Рускиот совет за човекови права.
Тој, исто така, ги отфрли извештаите на групите за човекови права за формирање „логори“ каде што се држат стотици руски дезертери, нарекувајќи ги таквите извештаи „лажни“.
Предупредувајќи дека војната најверојатно ќе биде „пролонгиран процес“, Путин се пофали со нови окупации на украинска територија (не споменувајќи дека Украина оттогаш ослободила некои од нив) и понуди мрачна перспектива за изгледите за нуклеарна војна.
„Таквата закана расте. Зошто да го негирате?” рече Путин.
