Русија не го прекинува учеството во договорот за извоз на многу потребното украинско жито преку пристаништата на Црното Море, туку го суспендира, изјави во понеделникот рускиот претседател Владимир Путин.
Тоа беше прва изјава на Путин на оваа тема откако Москва во саботата објави дека го замрзнува учеството во Црноморскиот договор постигнат со посредство на Обединетите нации, по, како што рече, големиот напад од украински беспилотни летала врз нејзината флота на Крим.
„Не велиме дека престануваме да учествуваме во оваа операција. Не. Ние велиме дека го суспендираме“, рече Путин на телевизиска прес-конференција.
Путин рече дека украинските беспилотни летала ги користеле истите коридори што ги користат бродовите за жито. „И со тоа, тие создадоа закана и за нашите бродови, кои треба да обезбедат безбеден извоз на жито, и за цивилните бродови што се занимаваат со тоа“, рече тој. Киев не ја презеде одговорноста за нападот.
Другите учесници во договорот продолжија да извезуваат жито во понеделникот, иако Русија рече дека тоа е ризично.
„Украина мора да гарантира дека нема да има закана за цивилните бродови или за руските бродови за снабдување“, рече Путин, истакнувајќи дека според условите на договорот, Русија е одговорна за безбедноста.
