На светските берзи цените на нафтата паднаа минатата недела бидејќи трговците стравуваат дека забавувањето на растот на најголемите светски економии ќе предизвика пад на побарувачката за „црното злато“.
Цената на барелот на лондонскиот пазар минатата недела падна за 1,5 отсто, на 96,72 долари, додека на американскиот пазар барелот падна за 1,45 отсто, на 90,77 долари.
Цените на нафтата последните денови осцилираа во тесен опсег бидејќи ситуацијата во најголемите светски економии не е завидна.
Американската економија технички е во рецесија, а рецесијата поради енергетската криза ја загрозува и еврозоната, додека растот на азиските економии, особено на кинеската, забавува.
„Главниот извор на страв во моментов е глобалната рецесија и слабеењето на побарувачката, со оглед на слабите податоци од САД, еврозоната и Кина. Има знаци на забавување на економскиот раст, што би можело да ја намали побарувачката на нафта“, велат аналитичарите на PVM во прегледот на состојбата на пазарот.
Трговците се плашат и од дополнително забавување на растот на најголемите светски економии, бидејќи се очекува дополнително зголемување на каматните стапки во САД и во еврозоната, имајќи предвид дека централните банки треба да ја потиснат претерано високата инфлација.
Дополнително, на цените негативно влијае и силниот долар, што ја прави нафтата поскапа за купувачите во други валути.
Индексот на доларот, кој го покажува движењето на американскиот долар во однос на другите шест најважни светски валути, минатата недела скокна за 2,2 отсто на 108,00 поени, што е највисоко ниво за повеќе од еден месец.
„Продолжениот тренд на силен долар би бил една од најголемите пречки за постојан пораст на цените на нафтата“, вели Џим Ритербуш од Ритербуш и соработници.
Од друга страна, цените беа поддржани од големиот пад на залихите во САД минатата недела, бидејќи компаниите најдоа купувачи во европските земји кои сакаат да ја заменат руската нафта пред санкциите на Европската унија против Русија, кои стапуваат на сила на 5 декември.
Американскиот извоз скокна на рекордни пет милиони барели дневно.
„Пресметуваме дека ЕУ ќе треба да замени 1,2 милиони барели дневно увоз од Русија со сурова нафта од други региони“, се наведува во белешката на советодавната компанија ФГЕ.
Откако минатата година пораснаа за повеќе од 50 отсто, благодарение на закрепнувањето на светската економија од кризата со корона, од почетокот на оваа година, цените на нафтата, најмногу поради војната во Украина, пораснаа за нешто повеќе од 20 отсто. .
