Студентите во Србија денеска ја блокираа работата на околу 40 државни факултети оддавајќи им почит на жртвите од трагедијата што се случи на Железничката станица во Нови Сад. Во Белград, Нови Сад, Ниш и Чачак 15 минути беше блокиран сообраќајот.
„Ние како студенти сме обвинети дека добиваме странски финансии и водиме „хибридна војна“ во туѓо име. Во оваа прилика се оградуваме од сите политички партии и симболи и потсетуваме дека наша единствена цел е итно исполнување на нашите барања“, потенцираат во соопштението студентите на Факултетот за драмски уметности.
Група студенти денеска нешто пред 13 часот успеаја да влезат во зградата на Ректоратот во Нови Сад, која претходните денови беше заклучена поради блокадата на факултетот во универзитетскиот кампус.
Студентите оставија пошта пред неколку факултети. Тие држеа пароли:
„Блокиран сум затоа што сакам да останам во Србија“, „Сочувствувам, затоа постојам“, „Протестот е тест“…
Мал инцидент се случил на булеварот Крал Александар во Белград, кога возач на автомобил сакал да помине и покрај тоа што студентите на Техничкиот факултет го блокирале патот. Меѓутоа, ситуацијата набрзо се смирила бидејќи возачот свртил и тргнал во друга насока.
Владата на Србија денеска почна да објавува документи поврзани со трагедијата во Нови Сад, што беше едно од барањата на студентските блокади. Претседателот на Србија, Александар Вучиќ, синоќа изјави дека се исполнети сите барања.
– Што се однесува до граѓаните кои беа уапсени за протестирање, сите беа ослободени. Никогаш не сум дал помилување, ако бидат осудени за дивеењето во Нови Сад или Белград, јас лично ќе донесам одлука за помилување. Така што сите ваши барања се решени – рече Вучиќ.
Од друга страна, студентите тврдат дека не им се исполнети сите барања и додаваат дека продолжуваат со блокадите.
