Сириските бунтовнички сили соопштија дека планираат да ги затворат злогласните сурови затвори, што ги раководеше соборениот претседател Башар ал Асад, и да ги ловат оние кои се вклучени во убиствата или во тортурата на затворениците, објави Би-Би-Си.
Водачот на бунтовниците, Ахмед ал Шара, познат и како Абу Мухамад ел Џулани, рече и дека ќе ги распушти безбедносните сили на поранешниот режим.
По падот на владата на Асад во неделата се појавија видеа на кои се гледа како илјадници затвореници се ослободуваат од затворот Сајднаја – наречен „кланица на луѓе“ од групите за човекови права.
Речиси 60.000 луѓе биле мачени и убиени во затворите на Асад, соопшти набљудувачката група со седиште во Велика Британија, Сириската опсерваторија за човекови права.
Исламистичката милитантна група на Џолани, Хајат Тахрир ал-Шам (ХТС), ги предводеше другите сириски бунтовнички фракции во молскавична офанзива што го собори 54-годишното владеење на династијата Асад.
Асад побегна во Русија, во раните утрински часови во неделата, каде што тој и неговото семејство добија азил откако бунтовниците го зазедоа главниот град Дамаск.
Во посебна изјава, Џолани рече дека нема да има помилувања за оние кои учествувале во тортура или во убиство на затвореници.
– Ќе ги гониме во Сирија и ќе бараме од земјите да ги предадат оние што побегнаа за да можеме да ја постигнеме правдата – рече тој.
По падот на претседателот Башар ал-Асад, Сиријците брзаат во злогласните затвори на режимот, очајно барајќи ги своите најблиски. Во извештајот од 2022 година, Здружението на затвореници и исчезнати во затворот „Сајднаја“, со седиште во Турција, рече дека „Сајднаја“ станал логор на смртта по почетокот на граѓанската војна во 2011 година.
Џолани, исто така, рече дека ќе ги распушти безбедносните сили на поранешниот режим на Асад. Не е јасно колку бргу тие би можеле да бидат реконструирани од бунтовничките борци поради загриженоста за израелските напади врз воената инфраструктура на земјата.
